Սբ. Թադեոս Եկեղեցի :: ՀԱՅԱՍՏԱՆԻ ՊԱՏՄԱԿԱՆ ՀՈՒՇԱՐՁԱՆՆԵՐ

Սբ. Թադեոս Եկեղեցի

Թուրքիա / Վան / Հայոց Ձոր / Կեմ

Պատմություն

Կեմն ուներ Սբ. Թադեոս անվամբ քարաշեն եկեղեցի, որի վերաբերյալ 1883 թ. նշվել է. «Գիւղիս եկեղեցւոյ տաճարն բարձր ճարտարապետի գործ է, և ըստ ավանդութեան «առաքելաշէն», որոյ ի նշան ցոյց կը տան տաճարի դրան վերայի մի խաչաքար, որոյ մէջտեղն բեւեռ կայ մխուած, զի առաքելոց և մանաւանդ Թադէոս առաքելոյն յատուկ է եղած իւր օծած խաչերու մէջտեղը բեւեռ զարնելն»:

Միրախորեան Մ., Նկարագրական ուղեւորութիւն հայաբնակ գաւառս Արեւելեան Տաճկաստանի, մասն Ա, Կ.Պօլիս, 1884, էջ 139: Սամվել Կարապետյան, Հայաստանի պատմություն, հ. Ա, Հայոց Ձոր, Երևան, 2015, էջ 136:

Համիդյան ջարդի օրերին՝ 1895 թ., եկեղեցին կողոպտվում է:

«Արարատ», 1896, Բ, էջ 89: Սամվել Կարապետյան, Հայաստանի պատմություն, հ. Ա, Հայոց Ձոր, Երևան, 2015, էջ 136:

Ի դեպ, 1915 թ. հուլիսի 8-ին Վանի գավառային վարչությունն արտոնում է կեմցիներին իրենց գյուղի եկեղեցու և դպրոցի վերաշինության համար բավարար քանակությամբ ատաղձ կտրել:

Հայաստանի ազգային դիվան, ֆ. 242, ց. 1, գ. 14, 1-ին մաս, թ. 71: Սամվել Կարապետյան, Հայաստանի պատմություն, հ. Ա, Հայոց Ձոր, Երևան, 2015, էջ 136:

Եկեղեցին հիմնահատակ ոչնչացվել է թերևս հենց 1920-1930-ական թվականներին: Ընդ որում, յուրացվել են թե՛ կառույցի քարերը (որպես շինանյութ) և թե՛ նրա զբաղեցրած տարածքը: Այդ իսկ պատճառով կացությունը հուսահատեցնող էր նույնիսկ 1969 թ. ուսումնասիրության նպատակով գյուղ այցելած Ժ-Մ. Թիերրիի համար:

Thierry J-M., Monuments arméniens du Vaspurakan, Paris, 1989, էջ 348: Սամվել Կարապետյան, Հայաստանի պատմություն, հ. Ա, Հայոց Ձոր, Երևան, 2015, էջ 136:

Մինչև Մեծ եղեռնը եկեղեցին ոչ միայն ուներ ձեռագիր երեք Ավետարան, որոնցից երկուսը հայտնի էին Կարմիր և Ծաղկաբեր անուններով, այլև արծաթապատ կողերով Ավետարաններ և եկեղեցական այլ իրեր, որոնք Մեծ եղեռնի օրերին հրո ճարակ են դառնում: