Գաղթականական դպրոց Դպրոց :: ՀԱՅԱՍՏԱՆԻ ՊԱՏՄԱԿԱՆ ՀՈՒՇԱՐՁԱՆՆԵՐ

Գաղթականական դպրոց Դպրոց

ԼՂՀ / Շահումյան / Ներքիշեն

Պատմություն

1916 թ. Արևմտյան Հայաստանից գաղթած հայ մանուկների համար Ներքիշենում գործում էր դպրոց, որը «...շարունակւում է շնորհիւ գաղթ. գլխաւոր լիազօր պ. Ա. Բորեանին, որը պատրաստ է միշտ առանց վայրկեան ուշացնելու հոգալ դպրոցի կարիքները: Աշակերտները ճարպիկ են ու աչալուրջ, սակայն դժբախտաբար ոտաբոբիկ ու մերկ»:

X, նշվ. թղթակց., «Համբաւաբեր», 1916, դ 49, 4 դեկտեմբերի, էջ 1551-1552:
Սամվել Կարապետյան, Հայաստանի պատմություն, Մռավականք, հ. Դ, Երևան, 2019, էջ 172:

1917 թ. նոյեմբերի 22-ին Արմենակ Բորյանը ԿՀԲԸ կից Հայկական կենտրոնական կոմիտեին գրել է. «Անցեալ... ն. տարւայ սկզբից (հոկտեմբերից) կոմիտէիտ յանձնարարութեամբ Գանձակ և նրա շրջանում բացւեցին 14 դպրոց 600 աշակերտութեամբ: 5 դպրոցում պաշտօնավարել են տեղական ծխական դպրոցի ուսուցիչներ, իսկ մնացեալ դպրոցներում` գաղթական ուսուցիչներ են եղել: Այս տարի սպասւում էր, որ 14 դպրոցին պիտի աւելանային մի քանի դպրոցներ ևս. մինչդեռ կատարւեց հակառակը, այսինքն` Ներքի-Շէն, Վերին-Շէն, Փիբ, Բանանց, Միրզիկ, Ոսկանապատ, Գառնակեր գիւղերի գաղթական աշակերտ-աշակերտուհիներ մնացին առանց ուսման»:

Հայաստանի ազգային դիվան, ֆ. 28, ց. 1, գ. 170, թ. 5:
Սամվել Կարապետյան, Հայաստանի պատմություն, Մռավականք, հ. Դ, Երևան, 2019, էջ 172:

Կրթությունը խորհրդային տարիներին. ըստ ներքիշենցի Մովսես Շատվերյանի` 1928 թ. Ներքիշենում գործում էր 7-ամյա դպրոց:

Հայաստանի ազգային դիվան, ֆ. 1159, ց. 10, գ. 52, թ. 22 շրջ.:
Սամվել Կարապետյան, Հայաստանի պատմություն, Մռավականք, հ. Դ, Երևան, 2019, էջ 172:

1936 թ. գյուղում կար թերի միջնակարգ դպրոց (տնօրեն՝ Հ. Մանվելյան):

Պապյան Ա., Թղթակցություն, «Լենինյան ուղի», 1936, N 66, 25 նոյեմբերի, էջ 4:
Սամվել Կարապետյան, Հայաստանի պատմություն, Մռավականք, հ. Դ, Երևան, 2019, էջ 172:

Մեկ տարի անց նշվել է. «Շահումյանում անգրագիտության վերացման խնդրում քիչ են աշխատում: Գյուղը ունի բավականին թվով անգրագետներ, բայց տեղական կազմակերպությունը այդ մասին չի մտածում»:

Միրումյան Հ., Թղթակցություն, «Լենինյան ուղի», 1937, N 11, 28 փետր., էջ 4:
Սամվել Կարապետյան, Հայաստանի պատմություն, Մռավականք, հ. Դ, Երևան, 2019, էջ 172:

1970 թ. Ներքիշենում գործում էին հայկական և ռուսական միջնակարգ, ինչպես նաև գիշերօթիկ դպրոցներ (1965 թ.-ից):