Հովադար (Հուդեր) Բերդ :: ՀԱՅԱՍՏԱՆԻ ՊԱՏՄԱԿԱՆ ՀՈՒՇԱՐՁԱՆՆԵՐ

Հովադար (Հուդեր) Բերդ

Իրան / Արևմտյան Ատրպատական / Սալմաստ / Հավդուռ

Տեղադրություն

Գտնվում է գյուղից 2 կմ հյուսիս-արևմուտք. «Հովադար ամրոցը, Սալմաստի հիւսիսակողմում, դրած էր Բաբարզան լեռնագօտու լանջի վերայ և այս պատճառով ամրոցը Բաբարզանի կողմից անմատչելի էր»:

«Արարատ», 1892, Գ, էջ 204:
Սամվել Կարապետյան, Հայաստանի պատմություն, Սալմաստ, հ. Բ, Երևան, 2017, էջ 297:

Պատմություն

Նկատելի են պարսպահիմքերի և սենյակների հետքեր: Ամբողջությամբ պահպանվել է Վանի թագավորության ժամանակաշրջանից մեզ հասած ուրարտական վիմակերտ երկու դամբարան: Առաջինն ուղղանկյուն կանոնավոր հատակագծով երկսենյականոց դամբարանն է (10,55 x 9,56 մ, բարձրությունը՝ 190 սմ), որտեղ առաջնորդում են բավականաչափ մաշված վիմակերտ աստիճանները: Մուտքը հյուսիսային կողմից է: Ներսում՝ կենտրոնական մասում, ենթադրաբար մինչև 4 մետր խորությամբ հոր կա (ներկայումս լցված է հողով):

«Պայման», 2014, N 68:
Սամվել Կարապետյան, Հայաստանի պատմություն, Սալմաստ, հ. Բ, Երևան, 2017, էջ 297-298:

Ավելի փոքր և անկանոն հատակագծով երկրորդ՝ չորս սենյակից բաղկացած դամբարանի չափերն են՝ 9, 55 x 6,17 մ: Այստեղ ուշագրավն այն է, որ հիմնական սրահից (խցից) տարբեր ուղղություններով բացվում են չափերով գրեթե համահավասար երեք խցեր:

Սամվել Կարապետյան, Հայաստանի պատմություն, Սալմաստ, հ. Բ, Երևան, 2017, էջ 298:

Տարածքում գտնվել է նաև շուրջ 15 հազար տարվա վաղեմության (մարդկային գործունեության արգասիք) օբսիդիանից տաշված կտրող գործիք: Պահպանված առատ խեցեղենը հուշում է, որ ամրոցը բնակելի է եղել մինչև զարգացած միջնադար:

Սամվել Կարապետյան, Հայաստանի պատմություն, Սալմաստ, հ. Բ, Երևան, 2017, էջ 298:

Հեղինակը Սամվել Կարապետյան
Տարեթիվ 2011 թ․