Արական գիմնազիա :: ՀԱՅԱՍՏԱՆԻ ՊԱՏՄԱԿԱՆ ՀՈՒՇԱՐՁԱՆՆԵՐ

Արական գիմնազիա

Վրաստան / Ախալցխա / Ախալցխա

Պատմություն
1910 թ․

1910 թ. Կովկասի փոխարքայի քաղաքացիական մասի օգնական սենատոր Է. Ս. Վատացիի թույլտվությամբ հուլիսի 1-ին Ախալցխայում բացվում է արական չորսդասյա պրոգիմնազիա:

«Նոր Դպրոց», 1910, N 5, էջ 89: Սամվել Կարապետյան, Ախալցխա, Երևան, 2008, էջ 118:

1910 թվականին աբասթումանաբնակ սղնախեցիներ Միրաքյանցները, ի հիշատակ իրենց հանգուցյալ եղբոր` Եսայու, քաղաքում բացված պրոգիմնազիայի օգտին նվիրաբերում են 1000 ռուբ.:

«Մշակ», 1910, N 68: Սամվել Կարապետյան, Ախալցխա, Երևան, 2008, էջ 118:

1914 թ․

1914 թ. նախատեսվում է Ախալցխայի չորսդասյա պրոգիմնազիան վերածել ութդասյա գիմնազիայի: Այս մասին Թիֆլիսի նահանգապետն Ախալցխայի քաղաքային ավագի միջնորդությունն ուղարկում է Կովկասի ուսումնական մասի հոգաբարձուին` խնդրելով բավարարել խնդրանքը:

«Հորիզոն», 1914, N 49, էջ 3: Սամվել Կարապետյան, Ախալցխա, Երևան, 2008, էջ 118:

1916 թ․

1916 թ. հունվարի 1-ի դրությամբ ուներ 206 աշակերտ, որոնցից 105-ը հայ էր, 49-ը` վրացի, 24-ը` ռուս, 20-ը` այլազգի և 8-ը` թաթար:

“Кавказский календарь на 1917 г.”, Тифлис, 1916, с. 286-287. Սամվել Կարապետյան, Ախալցխա, Երևան, 2008, էջ 118:

1916 — 1917 թթ․

1916 թվականի վերջին որոշվում է արդեն գոյություն ունեցող արական գիմնազիային հավելել նաև օրիորդաց բաժինը, սակայն կարգավորված չէր շենքային հարմարության հարցը, որն էլ լուծվում է` շնորհիվ Կարապետ Բայբուրդյանցի նվիրաբերած Նիկոլաևսկայա և Դիվանյոլսկայա փողոցների անկյունում և կից գտնվող սեփական երկու տների: Դպրոցի բացումը պետք է տեղի ունենար 1917 թ. սկզբներին:

Կարապետ և Գրիգոր Մանուկյան Բայբուրդյանց եղբայրները հիշվում են ևս մեկ նվիրատվության առթիվ, որի համար արժանացել են կաթողիկոսի օրհնությանը («Արարատ», 1906, էջ 104): «Համբաւաբեր», 1917, N 6, էջ 137-138: Սամվել Կարապետյան, Ախալցխա, Երևան, 2008, էջ 118-119:

1917 թ․

Այլ տեղեկությամբ որոշ պատճառներով դպրոցի օրիորդաց բաժնի բացումը հետաձգվել է մինչև 1917 թ. սեպտեմբեր: Կրթօջախը պետք է ունենար երեք բաժանմունք. որպես տեսչուհի` հրավիրվել էր Ե. Միակևիչը:

«Շարժում», 1917, N 5, էջ 3: Սամվել Կարապետյան, Ախալցխա, Երևան, 2008, էջ 119:

1917 — 1918 թթ․

1917/1918 ուստարում Ախալցխայի արական գիմնազիան արդեն վերածվել էր քառամյա երկսեռ դպրոցի:

«Շարժում», 1917, N 3, էջ 1: Սամվել Կարապետյան, Ախալցխա, Երևան, 2008, էջ 119:

1917 — 1918 թթ․

Ի դեպ, 1917/1918 դժվարին ուստարվա ծախսերը հոգալու համար Քաղաքային խորհուրդն արական գիմնազիային է հատկացրել իր ենթակայության ներքո գտնվող ալյուրի ֆոնդի գումարներից 3800 ռուբլի: