Արշակ Հակոբյանի (Արշակ Հակոբյանց և ընկ., Արշ. Հակոբյանց և որդիներ, «Լույս») Տպարան

Արշակ Հակոբյանի (Արշակ Հակոբյանց և ընկ., Արշ. Հակոբյանց և որդիներ, «Լույս») Տպարան 1907 թ․

ՀՀ / Երևան

Պատմություն
1908 թ․

Արշակ Հակոբյանի (Արշակ Հակոբյանց և ընկ., Արշ. Հակոբյանց և որդիներ, «Լույս») տպարան (հիմն. 1907). 1908 թ. այս տպարանում հրատարակվում է «Հրազդան» գրական, հասարակական և տնտեսական թերթը, որի առաջին երկու համարների խմբագիրն ու հրատարակիչն էր Պողոս Կանդուրալյանը, ապա Ա. Տեր-Հակոբյանը: Մինչև 1909 թ. անկանոն պարբերականությամբ լույս է տեսնում 31 համար:

Պողոս Կանդուրալյանը գյուղատնտես էր: Ուսանել է Մոսկվայի Պետրովսկու անվան գյուղատնտեսական ակադեմիայում: 1901-1905 թթ. աշխատել է Երևանի նահանգային ուսումնարաններին կից գյուղատնտեսական բաժանմունքում որպես գյուղատնտես: Եղել է նաև Երևանի թեմական դպրոցի հոգաբարձու (մանրամասն տե՛ս Նազարյան Ս., Երևանի պարբերական մամուլը (1880-1917), Երևան, 1986, էջ 117-126): Հայ պարբերական մամուլը (1794-1980), էջ 73 (ի դեպ, ըստ Մ. Բաբլոյանի՝ թերթի խմբագիր-հրատարակիչը նախ Ա. Տեր-Հակոբյանն էր, ապա Պ. Կանդուրալյանը): Տե՛ս նաև Հայոց պարբերական մամուլը (1794-1934), էջ 55: Էմմա Աբրահամյան, Տպարանները հայոց հայրենիքում, «Վարձք», 2012, N 6, էջ 11:

1911 — 1912 թթ․

1911-1912 թթ. «Լույս» տպարանում Վահան Աբրահամյանի խմբագրությամբ լույս են տեսնում «Նոր ձայն» գրական, հասարակական և «Կռան» գրական, հասարակական-տնտեսական, երգիծական շաբաթաթերթերը (վերջինիս խմբագիրն էր Մուշեղ Բագրատունին):

Հայ պարբերական մամուլը (1794-1980), էջ 88-89: Տե՛ս նաև Հայոց պարբերական մամուլը (1794-1934), էջ 68-69: Նազարյան Ս., Երևանի պարբերական մամուլը (1880-1917), Երևան, 1986, էջ 128-135, 147: Մուշեղ Բագրատունին (1870, Կարբի գյուղ - 1945) սկզբնական կրթությունը ստացել է Շամախու քառամյա դպրոցում: Հոր մահից հետո տեղափոխվում է Երևան: Սոցիալ-դեմոկրատական կուսակցությանը հարելու և արգելված գրականություն տարածելու պատճառով 1904 թ. ձերբակալվում է և 1905 թ. ազատվում: Աշխատակցում է Թիֆլիսում և Բաքվում լույս տեսնող բոլշևիկյան և սոցիալ-դեմոկրատական մի քանի թերթերի: 1920 թ. ունեցվածքի բռնագրավմամբ աքսորվում է Գառնի գյուղ, ապա Պարսկաստան: 1921 թ. վերադառնում է Երևան և նշանակվում Բաշ-Գառնի գյուղի հեղկոմի նախագահ: «Շոռ և Շոռշոռ» կինոսցենարի հեղինակն է (մանրամասն տե՛ս Նազարյան Ս., Երևանի պարբերական մամուլը (1880-1917), Երևան, 1986, էջ 160-166): Էմմա Աբրահամյան, Տպարանները հայոց հայրենիքում, «Վարձք», 2012, N 6, էջ 11:

1918 — 1919 թթ․

1918-1919 թթ. «Լույս» տպարանում է հրատարակվում ՀՀ դաշնակցության աշակերտական միության օրգան «Շանթ» թերթը Հ. Ասատրյանի խմբագրությամբ, 1918-1920 թթ.՝ «Ժողովուրդ» թերթը:

Հայ պարբերական մամուլը (1794-1980), էջ 114, 118: Ի դեպ, «Շանթ» թերթը տպագրվում է նախ «Լույս», ապա ՆԳ նախարարության տպարանում: Էմմա Աբրահամյան, Տպարանները հայոց հայրենիքում, «Վարձք», 2012, N 6, էջ 12:

Իր գործունեության ընթացքում այս տպարանում հրատարակվում են հայերեն 54 և ռուսերեն 6 գիրք, 10 թերթ:

Էմմա Աբրահամյան, Տպարանները հայոց հայրենիքում, «Վարձք», 2012, N 6, էջ 12:

Անվանում	Հիշ. ժամանակը	Ստուգաբանություն
Արշակ Հակոբյանց և ընկերներ
Արշակ Հակոբյանց և որդիներ
«Լույս»