Դպրոց :: ՀԱՅԱՍՏԱՆԻ ՊԱՏՄԱԿԱՆ ՀՈՒՇԱՐՁԱՆՆԵՐ

Դպրոց

ԼՂՀ / Հադրութ / Քյուրաթաղ

Պատմություն

Հիմնադրման ստույգ տարեթիվը հայտնի չէ, սակայն գործունեության առաջին վկայությունը վերաբերում է 1886 թ., երբ նախակրթարանում ուսանում էր 15 աշակերտ: Երկու տարի անց քյուրաթաղցի մանուկների առջև իր դռներն է բացում եկեղեցական-ծխական դպրոցը, որտեղ մեկ ուսուցչի օգնությամբ կրթություն էր ստանում 20 երեխա: Հայկական դպրոցների վերաբացվելու թույլտվությունը ստանալուց երկու տարի անց՝ 1907/08 ուստարում, որպես միդասյա երկսեռ դպրոց, Վրույր Առաքելյանի դասատվությամբ սկսում է գործել նաև Քյուրաթաղի կրթարանը (45 աշակերտ, որից 12-ը՝ աղջիկ): 1924 թ. փետրվարին գումարված հասարակական ժողովում որոշվում է կառուցել դպրոցի շենք և այն կոչել Լենինի անունով: Սակայն 1924/25 ուստարում փակվում է: Պետք է նշել, որ գյուղում միաժամանակ գործում էր անգրագիտության վերացման կայան, ուր հաճախում էր 30 մեծահասակ:

Ավանեսյան Ա., Հարությունյան Գ., Արցախի կրթական համակարգը, հ. 1, Երևան, 2014, էջ 373:
Շ. Վարդունի, Դիզակ, «Կոմունիստ» /Բաքու/, 1924, N 46, 28 փետրվարի, էջ 3:
Գասպարյան Ս., Քյուրաթաղ գյուղի կյանքից, «Խորհրդային Ղարաբաղ», 1925, N 13, 12 ապրիլի, էջ 3:
Էմմա Աբրահամյան, Քյուրաթաղ, «Վարձք», N 17, 2022, էջ 58:

1925 թ.-ից սկսվում է դպրոցի կառուցումը, որը, սակայն, նյութական միջոցների բացակայության պատճառով 1927 թ. դեռ ավարտին չէր հասել:

Սուլիչ, Հարկավոր է օգնություն, «Խորհրդային Ղարաբաղ», 1927, N 15, 16 ապրիլի, էջ 5:
Էմմա Աբրահամյան, Քյուրաթաղ, «Վարձք», N 17, 2022, էջ 58:

1929 թ. կոչ է արվում դպրոցի շենքի շինարարությունն ամբողջացնելու նպատակով աջակցել քյուրաթաղցիներին. «Պատերն արդեն պատրաստ են, կտուրը ծածկելու համար թիթեղն էլ կառավարությունն է բաց թողել, բայց դեռ պատերի սվաղը, պատուհանների ապակիններն ու հատակի և առաստաղի տախտակները պակասում են: Գյուղացիք այլևս ուժ չունեն այդ պատրաստելու: Անհրաժեշտ է օգնության հասնել քյուրաթաղցիներին...»:

Արզաղ, Դպրոցը կիսատ է մնացել, «Կոմունիստ» /Բաքու/, 1929, N 86, 15 ապրիլի, էջ 3:
Էմմա Աբրահամյան, Քյուրաթաղ, «Վարձք», N 17, 2022, էջ 58:

2001/02 ուսումնական տարում Քյուրաթաղի ութամյա միջնակարգ դպրոցում ուսանում էր 45 աշակերտ:

Էմմա Աբրահամյան, Քյուրաթաղ, «Վարձք», N 17, 2022, էջ 58:

2008 թ. կառուցվում է դպրոցի նոր շենք, որը գտնվում էր «...գյուղից փոքր-ինչ հեռու, և այնտեղ հասնելու համար աշակերտներն ու ուսուցիչները ամեն օր պետք է անցնեն դժվարամատչելի և հողածածկ ճանապարհով»: