Դպրոց :: ՀԱՅԱՍՏԱՆԻ ՊԱՏՄԱԿԱՆ ՀՈՒՇԱՐՁԱՆՆԵՐ

Դպրոց 1914 թ․

Վրաստան / Կախեթ / Սագարեջո / Սագարեջո

Պատմություն
1909 թ․

1909 թ. նոյեմբերի 8-ին գյուղի հայ համայնքը որոշել էր Սբ. Աստվածածին եկեղեցու բակում կառուցել երկու սենյակից բաղկացած դպրոցական նոր շենք: Այդ նպատակով ընտրել էին երեք հոգու՝ Ալեքսի Ռևազյանին, Աբրահամ Մարտիրոսյանցին և Եագոր Ռևազյանցին, որպեսզի երեցփոխ Շաքար Պեպանյանցի հետ լուծեն (եկեղեցու և ժողովրդի գումարներով) դպրոցի կառուցման գործը: Ըստ նախահաշվի՝ ծախսը կազմում էր 600 ռուբլի:

Հայաստանի ազգային արխիվ, ֆ. 53, ց. 1, գ. 1304, թ. 7-8:

1914 թ․

Սակայն դպրոցի բացումն ինչ-ինչ պատճառներով ձգձգվել էր և իրականություն դարձել միայն 1914 թ.: Այդ առթիվ ժամանակի մամուլը գրել է. «Այս գիւղը, որը ունի մօտ 100 տուն հայ բնակիչ և որը Թիֆլիսից հեռու է հազիւ 20 վերստով, մինչև օրս զուրկ է եղել մայրենի դպրոցից, որի կարիքը մեր օտարախօս և օտարամոլ գիւղերում ամենակենսական պահանջն է ու նրա գոյութեան առաջին պատուանդանը: Ամսիս 2-ին բացվեց Սագարէջօ գիւղի դպրոցը, որի նախաձեռնողը և նրա մասին հոգացողը եղել է Ղ. աւ. ք. Մամիկոնեան...»: Երկսեռ աշակերտության ընդհանուր թիվը եղել է 50 սան:

«Մշակ», 1914, № 260, էջ 3:

1916 — 1917 թթ․

1916/17 ուստարում դպրոցը գործել է՝ շնորհիվ Կովկասի հայոց բարեգործական ընկերության հատկացրած 200 ռուբ. նպաստի:

«Համբաւաբեր», 1916, № 33, էջ 1034:

1919 թ․

Դպրոցը գործել է նաև 1919 թ.՝ խորհրդային կարգերի հաստատման առաջին տարիներին, ապա փակվել: