Սբ. Գևորգ Եկեղեցի :: ՀԱՅԱՍՏԱՆԻ ՊԱՏՄԱԿԱՆ ՀՈՒՇԱՐՁԱՆՆԵՐ

Սբ. Գևորգ Եկեղեցի

ԼՂՀ / Քաշաթաղ / Հայրի

Պատմություն

Գյուղամիջում այսօր էլ կանգուն է Սբ. Գեւորգ միանավ թաղածածկ եկեղեցին: Այս եկեղեցու գոյությունը առաջինը փաստել է Ե. Լալայանը: Նա նշել է, որ «Հերիկ» գյուղատեղիում հաստատված մահմեդականները եկեղեցին օգտագործում էին որպես խոտանոց: Խորհրդային տարիներին էլ եկեղեցին միեւնույն նպատակին է ծառայել եւ գուցե թե հենց այդ պատճառով մեզ է հասել կանգուն վիճակով:

«Ազգագրական հանդէս», գիրք Դ, N 2, Թիֆլիս, 1898, էջ 49։
Եկեղեցու անունը գիտեին տեղի թրքացած քրդերը (մինչեւ տարածքի ազատագրումը) եւ կոչում էին «Փիր Գեւորգ»։ Սամվել Կարապետյան, Հայ մշակույթի հուշարձանները Խորհրդային Ադրբեջանին բռնակցված շրջաններում, Երևան, 1999, էջ 132:

Ճարտարապետություն

Այն կառուցված է անմշակ քարով, կրաշաղախով: Միակ մուտքը հարավից է: Ավանդատներ չունի: Հողածածկ, երկթեք տանիքը ներքուստ պահում է մեկ զույգ որմնասյան վրա հենված թաղակիր կամարը: Հյուսիսային պատի մեջ իր ավանդական տեղում է մկրտարանի ավազանը: Պատերն ունեն 1,3 մ հաստություն: Շենքի արտաքին չափերն են` 16,3 x 9,7 մ: Կառուցման ժամանակ պատերի մեջ ագուցվել են գերեզմանական բնույթի հուշարձաններ: Մասնավորապես՝ մուտքին իբրեւ բարավոր տապանաքար է ագուցված, իսկ հարավային ճակատում, մուտքի արեւելյան անկյունում ագուցված է դեղին կրաքարից կերտված (չափերը 162 x 84 x 30 սմ) խաչքար:

Սամվել Կարապետյան, Հայ մշակույթի հուշարձանները Խորհրդային Ադրբեջանին բռնակցված շրջաններում, Երևան, 1999, էջ 132-133:

Տեսակը Լուսանկար
Տեսքը հատված
Հեղինակը Սամվել Կարապետյան
Աղբյուրը Սեւ-սպիտակ նեգատիվ

Անվանում	Հիշ. ժամանակը	Ստուգաբանություն
Փիր Գեւորգ