Կամուրջ :: ՀԱՅԱՍՏԱՆԻ ՊԱՏՄԱԿԱՆ ՀՈՒՇԱՐՁԱՆՆԵՐ

Կամուրջ

ԼՂՀ / Պարտավ

Տեղադրություն

Գտնվում է պատմական Հայոց Աղվանքի մայրաքաղաք Պարտավ քաղաքատեղիում` մերօրյա Բարդա քաղաքի հարևանությամբ` Տրտու (Թարթառ) գետի հին հունի վրա: Ծովի մակերևույթից ունի 77 մ բարձրություն:

Սամվել Կարապետյան, Արցախի կամուրջները, Երևան, 2009, էջ 18:

Հիմնադրում
5 — 7 դդ․

Անտարակույս, հետագա դարերում բազմիցս նորոգված կամրջի հիմնադրումը հարկ է վերագրել Պարտավի ծաղկման շրջանին` Ե-Է դարերին:

Կարապետյան Ս., Հայ մշակույթի հուշարձանները Խորհրդային Ադրբեջանին բռնակցված շրջաններում, Երևան, 1999, էջ 217-218:
Սամվել Կարապետյան, Արցախի կամուրջները, Երևան, 2009, էջ 18:

Նկարագրություն
1880 թ․

1880-ական թթ. վերջերին վաղուց արդեն ավերված կամրջի մասին ականատեսը նշել է. «...170 մետր երկարութիւն, 5 մետր լայնութիւն եւ 16 աչք, որոնց կամարներն արդէն քանդուած են և մնում են միայն ոտներն և երկու կողմերի պատերն: Սրբատաշ եղած են բոլոր անկիւնաքարերն, իսկ անտաշ` մնացեալ քարերն: Ինչպէս վկայում են, ունեցած է հայերէն արձանագրութիւն, բայց անյայտացած է, չկայ այժմ...»:

Բարխուտարեանց Մ., Արցախ, Բագու, 1895, Էջ 31-32։
Տե'ս նաև Սամվել Կարապետյան, Հայ մշակույթի հուշարձանները Խորհրդային Ադրբեջանին բռնակցված շրջաններում, Երևան, 1999, էջ 221:
Սամվել Կարապետյան, Արցախի կամուրջները, Երևան, 2009, էջ 18:

Ճարտարապետություն

15 միջանկյալ և զույգ եզրային զանգվածեղ կամրջախելերի միջև 16 թռիչքներով ձգվող կամրջի մնացորդները, ըստ հետագա առավել վստահելի չափագրական տվյալների, ունեին միայն 4 մ անցուղու լայնություն և 120 մ ընդհանուր երկարություն: Շինանյութը գետաքար և կրաշաղախ է:

Усейнов М., Бретаницский Л., Саламзаде А., История архитектуры Азербайджана, Москва, 1963, с. 40.
Սամվել Կարապետյան, Արցախի կամուրջները, Երևան, 2009, էջ 18: