Սբ. Աստվածածին Եկեղեցի :: ՀԱՅԱՍՏԱՆԻ ՊԱՏՄԱԿԱՆ ՀՈՒՇԱՐՁԱՆՆԵՐ

Սբ. Աստվածածին Եկեղեցի

Ադրբեջան (ոչ Արցախ) / Իսմայիլի / Ավանաշեն

Պատմություն

Գյուղում պահպանված արժեքավոր հուշարձաններից է Սբ. Աստվածածին եկեղեցին, որի շինարարական արձանագրությունը ժամանակին ընդօրինակել է Մ. Բարխուտարյանցը (ներկայումս պահպանված չէ)։

Սամվել Կարապետյան, Բուն Աղվանքի հայերեն վիմագրերը, Երևան, 1997, էջ 17:

1851 թ․

Արխիվային վավերագրերում գյուղի եկեղեցին առաջին անգամ հիշվում է 1851 թ.:

Հայաստանի Հանրապետության Պատմության պետական կենտրոնական արխիվ, ֆ. 56, ց. 1, գ. 2596, թ. 64-65:

1869 թ․

1869 թ. մարտի 26-ին այն ենթարկվել է կողոպտման. գողացել են՝ մեկ սկիհ, խաչ, վարագույր, ջահ:

Հայաստանի Հանրապետության Պատմության պետական կենտրոնական արխիվ, ֆ. 56, ց. 1, գ. 5347։

Ճարտարապետություն

Եկեղեցին եռանավ բազիլիկ է։ Քառանիստ ծածկի տակ առնված տանիքը ներքուստ պահում են երկու զույգ սյուները։ Արևելյան կողմում կիսաշրջան եզրագծով ավագ խորանն Է, որի աջ ու ձախ կողմերում մեկական ավանդատներ են։ Իրենց ավանդական տեղերում են սեղանի վեմ քարն ու մկրտության ավազանը (առաջինը՝ ավագ խորանի մեջտեղում, երկրորդը՝ հյուսիսային պատի մեջ)։ Եկեղեցին ամբողջապես կառուցված է անտաշ քարերով, կրաշաղախով։ Սրբատաշ են սյուները, թաղակիր կամարները, լուսամուտների և մուտքերի անկյունաքարերը։

Սամվել Կարապետյան, Բուն Աղվանքի հայերեն վիմագրերը, Երևան, 1997, էջ 17:

Նորոգություն
1869 — 1882 թթ․

1869-82 թթ. եկեղեցին նորոգվել է։ Վերջին նորոգության (փայտյա փտած տանիքը պետք է փոխարինվեր թիթեղածածկով) կարիքը զգացվել էր արդեն 1900 թ.։

Հայաստանի Հանրապետության Պատմության պետական կենտրոնական արխիվ, ֆ. 56, ց 2, գ. 5340: Հայաստանի Հանրապետության Պատմության պետական կենտրոնական արխիվ, ֆ. 56, ց. 1, գ. 9739, թ. 1:

Արձանագրություն, Հայերեն, Փորագիր, Շինարարական 1752 թ․

ՍԲ. ԱՍՏՎԱԾԱԾԻՆ ԵԿԵՂԵՑՈՒ շինարարական արձանագրությունը.
ՅԻՇԱՏԱԿ է ՍՈՒՐԲ ԱՍՏՈՒԱԾԱԾՆԱՅ ԵԿԵՂԵՑԻՍ, ՇԻՆԵՑԱՒ ԱՂԱ ՔԱԼԻ ԼԱԶՐՈՎԵՆՑ 1752 ԹՎԻՆ ՓՐԿՉԻՆ։

Բարխուտարեանց Մ., Աղուանից երկիր և դրացիք, Թիֆլիս, 1863, էջ 194։

Տեսակը Լուսանկար
Տեսքը արտաքին
Հեղինակը Սամվել Կարապետյան
Աղբյուրը Սեւ-սպիտակ նեգատիվ
Տարեթիվ 1984 — 1987 թթ․