Գյուղատնտեսական դպրոց :: ՀԱՅԱՍՏԱՆԻ ՊԱՏՄԱԿԱՆ ՀՈՒՇԱՐՁԱՆՆԵՐ

Գյուղատնտեսական դպրոց

Վրաստան / Ախալցխա / Ծուղրութ

Պատմություն
1908 թ․

Հայտնի է, որ դեռևս 1908 թ. ծուղրութցի բժիշկ Արտաշես Բուդուղյանը նախատեսել էր Ծուղրութում հիմնել գյուղատնտեսական դպրոց:

«Մշակ», 1908, N 127: Հարկ է նշել, որ Ա. Բուդուղյանի միջոցներով գյուղի դպրոցում դասավանդել են նաև շերամապահություն և զամբյուղագործություն (Փարսադանյան Ռ., Հայ բժշկության պատմությունից, Երևան, 1958, էջ 154): Սամվել Կարապետյան, Ախալցխա, Երևան, 2008, էջ 224-225:

1910 թ․

1910-ական թվականներին բժիշկ Արտաշես Բուդուղյանը համագյուղացիներին հայտնել է իր միջոցներով գյուղատնտեսական դպրոց հիմնելու մտադրության մասին: 1915 թ. Եղիշե քահանա Հակոբյանցի վկայությամբ` «Բժիշկ Բուդուղեանը մտածելով իր հայրենի գաւառի Ծուղրուտ գիւղում մի յիշատակ թողնել, անցեալ տարիներում Յովհ. Թումանեանի հետ գալիս է գիւղ և յայտնում հասարակութեան, թէ մտադիր է Ծուղրուտում հիմնել մի գիւղատնտեսական դպրոց իր միջոցներով, միմիայն այն պայմանով, որ գիւղը յատկացնի այդ նպատակի համար յարմար հող և շինութեան համար քար և փայտ: Գիւղի հասարակութիւնը տալիս է իր համաձայնութիւնը և բժիշկը վերադառնալիս ուղարկում է այդ նպատակի համար 120 պտղատու ծառեր»: Նույն թվականին արդեն իրականացվել են որոշ աշխատանքներ: Սակայն, ըստ ամենայնի, դպրոցը կյանքի չի կոչվել` 1915 թ. ապրիլի 10-ին բարերարի անսպասելի մահվան պատճառով. «Հայոց դպրոցների հոգաբարձութիւնը, խորապէս ցնցւած յայտնի հասարակական գործիչ և պետական ճշմարտութիւնների ժողովրդականացման ախոյեան բժ. Բուդուղեանի անսպասելի մահով, արտայայտում է իր անկեղծ ցաւակցութիւնը»: