Թատրոն :: ՀԱՅԱՍՏԱՆԻ ՊԱՏՄԱԿԱՆ ՀՈՒՇԱՐՁԱՆՆԵՐ

Թատրոն 1880 թ․

Վրաստան / Կախեթ / Սղնախ / Սղնախ

Պատմություն
1880 թ․

Սղնախում թատերական ներկայացումներ են կազմակերպվել 1880-ական թվականների սկզբից: Հայտնի է, որ 1880 թ. օգոստոսի 28-ին «Շուշանիկյան» օրիորդաց դպրոցի դահլիճում բարեգործական նպատակներով հայ թատերասեր երիտասարդների խումբը մի ներկայացում էր տվել, որն ուղեկցվել էր հայկական ազգային երգերով: Բեմի հարդարման գործին օժանդակել էր Եղիշե քահանա Տեր-Աստվածատրյանը:

«Մեղու Հայաստանի», 1880, № 72, էջ 3:

1882 — 1901 թթ․

Սղնախում թատերական գործի զարգացմանը գործուն մասնակցություն է ցուցաբերել Վարդան Ենիկոլոպյանը և Դավիթ Տեր-Ստեփանյանը. «Մինչև 1880 թ. Սղնախում թատրօնական գործը զարգացած չէր: Եղել են սակաւաթիվ ներկայացումներ: Ենիկոլոփեան Վարդանը և Տէր-Ստեփանեան Դաւիթը 1882 թ. կանօնաւոր ներկայացումներ են տալիս Սղնախում: Նրանք հաւաքում են երիտասարդներին, պատրաստում և բեմ դուրս բերում: Նրանց գործը աջողութեամբ պսակվեց: Նրանք ունեցան հետևողներ, որոնք շարունակեցին թատրօնական գործը: Ենիկոլոփեանը լաւ էր խաղում դրամատիկական, իսկ Տէր-Ստեփանեանը՝ կօմիկական դերեր: 1901 թ. Սղնախում տօնվեց նրա բեմական գործունէութեան 25-ամեայ յօբելեանը»:

«Մշակ», 1913, № 183, էջ 3:

1882 թ․

Թատերական խմբի բեմադրությունների մասին 1882 թ. գովեստով է խոսել նաև “Кавказ” օրաթերթի թղթակիցը՝ նշելով, որ օգոստոսի 15-ին ներկայացվել էր 2 ներկայացում, մեկը՝ վրացերեն, մյուսը՝ մայրենի լեզվով: Ընդ որում, թղթակիցը վկայում է, որ «ամեն անգամ այնքան շատ հանդիսատես է հավաքվում, որ տեղի հայկական ծխական դպրոցի ընդարձակ դահլիճը հազիվ է բավարարում»: Ի դեպ, դերասանուհիներ չլինելու պատճառով կանանց դերերը կատարում էին 14 և 16 տարեկան տղաներ: Ուշագրավ է, որ հիշյալ բեմադրության ընդմիջման ժամին ցուցադրվել էին Պետերբուրգի նկարչական ակադեմիայում ուսանած սղնախցի Եգոր Բաշինջաղյանի՝ թրքահայերի կյանքը պատկերող աշխատանքներ: